eng Grotesk a 5 Akten vum Nikolai Gogol
Regie an Iwwersetzung: Claude Mangen
“Man soll den Spiegel nicht schelten, wenn er eine Fratze zeigt”
Dem Gogol säi Koméidistéck vun 1836 ass eng batterbéis Kritik un enger korrupter Politik am Numm vum Vollék, vun der Regierung bis an déi klengst Gemeng. Eng Gesellschaftsfarce, déi Gurmangzegkeet a Verlugenheet am Grousse wéi am Klengen un der Pranger stellt.
An enger klenger Stiedchen – wäit wech, vergiess a verluer um Enn vun der Welt – stiechen s‘all ënner enger Decken. Keen ass besser wéi deen aner. Eng Hand wäscht déi aner. Am Spidol wuddert den Dreck bis op de Gank. De versoffene Schreiwert uerteelt um Geriicht wéi et em grad an de Kapp kënnt, däerbans de Riichter op d’Juecht geet. Déi gewielte Gemengvertrieder verfriessen a verjuppen, verspillen a verspekuléieren d’Suen déi se vum Saat kréien. Am Fong kéint et sou viru goen wa net op eemol de Revisör kéim fir d’Bicher an d’Konten z’iwwerpréiwen ! Et heescht de Revisör wier inkognito ënnerwee. Alle Beamten a politesch Responsabel, virop dem Buergermeeschter geet de Wapp. Wat ass wann de Revisör sech net bestieche léisst ?
Em déi nämlecht Zäit logéiert e jonke Bonvivant vu St.Péitersbuerg am verkommenen Duerf-Hotel. Zanter zwou Woche schonn, huet e weder säin Zëmmer nach säin Iesse bezuelt, a lieft op Puff. Huerteg gëtt behaapt hien wier de Revisör. Dowéinst besichen déi Iewecht hien fir mat him ze verhandelen. De Chlestakow awer mengt, se kéimen hir Rechnungen reklamméieren an dréint duerch. E bierelt a rost ronderëm sech, beschwéiert sech iwwer dee miserable Kascht an déi onkammout Zëmmeren. De Buergermeeschter ass verschootert an iwwerzeegt et mat engem richtegen Staatsbeamten zedinn ze hunn. E berouegt de jonke Mann, a geet op dat ( fir hien ) Inkognito-Spillchen an. De Chlestakow awer erzielt seng wouer Geschicht : dass en et biswell zu näischt bruecht huet a säi Papp en a seng Kanzlei zeréck geruff huet. Ma domat wëll e sech nach Zäit loossen, och well e kee Sue méi huet fir d‘ Heemrees. De Buergermeeschter schmiert e mat 400 Rubel a proposéiert fir e bei sech wunnen ze loossen.
Vu lo un, ginn dem Chlestakow Avance gemaach. E gëtt duerch d’Stad gefouert a kritt ëmmer nees Suen an de Grapp gedréckt. Hien denkt sech näischt dobäi, a mengt d’Leit wieren sou fein a generéis. Ganz séier duerchkuckt en awer dat Spillchen a weess dass se hien mat engem aneren verwiesselen. Hie spillt vun elo u matt, a verlobt sech souguer mam Buergermeeschter senger Duechter. Da mécht e séch duerch d’Bascht !! Während am Duerf Verlobung gefeiert gëtt, bréngt de Bréifdréier e Bréif an deem de Chlestakow séch iwwer déi ganz Band lëschteg mécht. De Bedruch flitt op, ma de jonke Mann ass längst fort. Awer wat méi schlëmm ass. Deen echte Revisör ass ukomm, a waart fir empfang ze ginn.
Justiz, Post, Schoul- a Gesondheetswesen, all si se korrupt bis op d’Schanken. Dem Nikolai Gogol säin Revisör ass méi aktuell wéi jee. Politskandaler, Bestiechung – ëffentlech Gelder déi verontreit ginn – Fetternwirtschaft – politesch Systemer déi zesumme kraachen – keen Dag vergeet wou net eng Sau duerch d’Duerf geschleeft gëtt.
Dowéinst passt sou e Stéck op Lëtzebuergesch an un d’Géigend ugepasst an engem Super-Waljoer 2016/2017 sécher gutt. ( 8. November 2016 Amerikanesche President – 23.04. a 07.05. Présidentiellen a Frankräich – Bundestagswahlen September 2017 an zu Lëtzebuerg 09.10. Gemengewalen )
Gespillt gëtt den 20., 21., 22., 25., 26., 27., 28. an 29. Juli 2017 zu Groussbus um Site vum Prommenhaff.